То нафаси охирин содиқ мемонем!

Дар қисми ҳарбии 051055-и Гвардияи миллии Ҷумҳурии Тоҷикистон ба ифтихори сержантону сарбозоне, ки тибқи даъват хизмати ҳатмии ҳарбиро ду сол бо муваффақият анҷом дода, ба эҳтиёт рухсат шудаанд, ҷамъомади тантанавӣ, баргузор гардид. Тибқи анъанаи низомиён Парчами ҷангии Гвардияи миллии Ҷумҳурии Тоҷикистон ба майдон бароварда шуда, таҳти оҳанги оркестри ҳарбӣ Суруди миллии Ҷумҳурии Тоҷикистон садо дод. Сипас, сардори Сарситод-муовини аввали Фармондеҳи Гвардияи миллии Ҷумҳурии Тоҷикистон генерал-майори гвардия Ҷонибек Ализода сарбозонро табрик намуда, таъкид кард, ки Шумо муддати ду соли хизмат таълим гирифта, маҳорату малакаи ҳарбӣ омӯхтед. Аз дониш, таҷриба, масъулияти ҳар яки Шумо на танҳо падару модар, инчунин Ватану миллат умеди калон доранд. Боварии комил дорам, ки аз ин баъд ҳам Шумо бо ифтихор ва ҳисси баланди ватандӯстӣ ҳамеша дастовардҳои кишвари соҳибистиқлолро муҳофизу нигаҳбон ҳастед ва ба савганди ёдкардаи худ то нафаси охирин содиқ мемонед.
Қисмати фараҳбахшу хотирмони ҷамъомад маросими хайрбод буд, ки сарбозон бо яке аз муқаддастарин нишонҳои хизмати ҳарбӣ-байрақи ҷангии Гвардияи миллии Ҷумҳурии Тоҷикистон, ки ҳамеша ҳамсафу фахри онҳо буд, хайрбод гуфтанд.
Дар идомаи чорабинии тантанавӣ ба сарбозону сержантон, ки хизмати Модар-Ватанро сарбаландона ба итмом расониданд, дар ҳузури наваскарон ва командирони ҷузъу томҳо билети ҳарбӣ ва ба чанде аз фаъолони чорабиниҳои варзишиву фарҳангӣ ифтихорнома ва мактубҳои минатдорӣ ба волидон сарфароз гардонида шуданд.
Ҷамъомади тантанавиро таҳти оҳангҳои мутантани ҳарбӣ расми гузашти низомӣ анҷом бахшид. Албатта, ҳар як амали шоиста боиси сарбаландӣ, ифтихору шараф аст. Ба хусус хизмати Модар- Ватан, ки анҷом додани он яке аз меъёрҳои ҷавонмардӣ мебошад ва он дар ҳама давру замон қарзу вазифаи муқаддаси ҳар як шаҳрванд дониста мешавад.



Шуъбаи иттилоот ва робита бо ҷомеа