Машғулиятҳои омӯзишӣ дар Маркази тайёрии кадрҳои Гвардияи миллӣ

Маркази тайёрии кадрҳои Гвардияи миллӣ аз рӯзи ташкилёбӣ то имрӯз барои тайёр намудани садҳо мутахассисони хурди техникӣ, сержантон, прапоршикон ва афсарони ҷавон барои пуррагардонии ҷузъу томҳои Гвардияи миллӣ саҳми арзанда дорад.
Аз аввали моҳи январи соли 2025 дар заминаи марказ ва қисми ҳарбии 051056 курси командирони отделения ва мутахассисони хурд ташкил карда шуд. Хизмачиёни ҳарбӣ ба курсҳои мазкур дар асоси Нақшаи ягонаи чорабиниҳои асосии Гвардияи миллӣ ҳар сол ду маротиба тибқи эҳтиёҷоти қисмҳои ҳарбӣ ҷалб карда мешаванд, ки дар он командирони отделения, нишонгир-наворбардор ва механик-ронандаҳо таълим гирифта, савияи дониш ва маҳорату малакаи касбии хешро сайқал медиҳанд.
Барномаи таълимии курсантон фанҳои асосии хизмати ҳарбиро дар бар мегирад, ки аз тарафи раёсати тайёрии ҷангии фармондеҳӣ омода карда шудааст. Фанҳои тайёрии техникӣ, ронандагӣ, оташфишонӣ, тактикӣ, тайёрии муҳандисӣ, маҳалнигорӣ, тайёрии разведка, ҷисмонӣ, тайёрии тиббӣ, оинномаҳои ҚМҶТ ва тайёрӣ оид ба алоқа аз фанҳои муҳими хизмати ҳарбӣ мебошанд, ки афсарони ботаҷоиба ба сарбозон оиди ҳар кадом маълумоти муфассал медиҳанд. Мақсад, моҳият ва вазифаҳои ҳар як фанни таълимиро мутахассисони самтҳои алоҳида дар машғулиятҳои назариявӣ ва амалӣ ба курсантон меомӯзонанд.
Ҳамчунин барои тайёр намудани мутахассисони хурд ва командирони отделения роҳбарони машғулият аз ҳисоби афсарони болаёқати фармондеҳӣ, дастурдиҳандагони ҷузъу томҳои таъиноти махсус ва ҳайати роҳбарикунандаи қисмҳои ҳарбӣ ҷалб карда шуданд.
Баъд аз хатми курси мазкур, ки се моҳро дар бар мегирад, хизматчиёни ҳарбӣ мувофиқи қобилият, шавқ ва хоҳишашон ба қисмҳои ҳарбӣ фиристода мешаванд.
Ба қавли масъулин, сарбозон дар муддати омӯзиш ҳамаи мушкилӣ ва рондани мошинҳои вазнини ҷангӣ, истифодаи силоҳу муҳимоти ҷангиро аз худ мекунанд. Онҳо донишҳои касбии худро дар машқгоҳҳои саҳроӣ ҳангоми тирпаронӣ ва идора кардани навъи техникаҳои ҳарбӣ идома дода, дар қисмҳои ҳарбӣ такмил медиҳанд.
Шуъбаи иттилоот ва робита бо ҷомеаи ГМҶТ