Саҳми ман- дар шаҳри ман

Бо мақсади дар амал татбиқ намудани дастуру супоришҳои Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паём ба Маҷлиси Олии кишвар оид ба эълон намудани Соли 2026 “Соли вусъат додани корҳои ободониву созандагӣ ва тақвияту таҳкими худшиносиву худогоҳии миллӣ дар Гвардияи миллии Ҷумҳурии Тоҷикистон нақшаи чорабиниҳо омода карда шудааст. Дар асоси ин чорабиниҳо бо ташаббуси ҳайати фармондеҳӣ хизматчиёни ҳарбии ҷузъу томҳои Гвардияи миллӣ, ки дар гарнизони Душанбе ҷойгиршудаанд, барои тозаву озода намудани каналу ҷӯйҳо, аз партовҳои гуногуни маишӣ, роҳҳои пиёдагарду канори шоҳроҳи нав дастҷамъона сафарбар гардиданд. Қад-қади роҳи калон, ки чанде пеш бо ташаббуси шаҳрдори Душанбе ба истифода дода шудаааст, зиёда аз 300 нафар афсарону сарбозон ба гурӯҳи бонувони тозакори Муассисаи давлатии истифодабарии роҳҳо дар ноҳияи Синои шаҳри Душанбе пайваста, дар ободу зебо намудани ин гӯшаи диёр саҳм гузоштанд. Хизматчиёни ҳарбӣ масофаи се километр канори роҳро, ки аз гардиши маҳаллаи Озодии занон то бозори Балхи ҳудуди ноҳияи Синоро аз алафҳои бегона, хасу хошок ва дигар партовҳо тоза карданд.
Қобили зикр аст, ки ташаббуси роҳбарияти Гвардияи миллӣ ба иқдоми шаҳрии ҷавонон “Саҳми ман дар шаҳри ман” рост омад. Мақсад аз баргузор намудани ҳамоиши мазкур тозаву озода нигоҳ доштани шаҳри Душанбе, пайравии ҷавонони пойтахт ба ташаббусҳои созанда ва бунёдкоронаи раиси шаҳри Душанбе муҳтарам Рустами Эмомалӣ ва дар сатҳи баланд баргузор намудани рӯзи пойтахти Ҷумҳурии Тоҷикистон-шаҳри Душанбе мебошад, ки ҳамасола шанбеи сеюми моҳи апрел таҷлил карда мешавад. Иштироки фаъолонаи ҷавонон-хизматчиёни ҳарбии Гвардияи миллии Ҷумҳурии Тоҷикистон дар раванди корҳои ободониву созандагӣ, нишони эҳтирому ифтихор аз пойтахти ватани маҳбуб мебошад, ки бо мақсади сазовор истиқбол гирифтани ҷашни 35-солагии Истиқлоли давлатии Тоҷикистон минбаъд ҳам идома меёбад.