Сафари расмии Фармондеҳи Гвардияи миллии Ҷумҳурии Тоҷикистон ба Гвардияи миллии Ҷумҳурии Ӯзбекистон

Дар асоси ҳамкориҳои дуҷонибаи Ҷумҳурии Тоҷикистон бо Ҷумҳурии Ӯзбекистон аз 24 то 26 ноябри соли 2021 гурӯҳи хизматчиёни ҳарбии гвардия таҳти роҳбарии Фармондеҳи Гвардияи миллии Ҷумҳурии Тоҷикистон генерал-лейтенанти гвардия Бобоҷон Ҷамолзода бо сафари хизматӣ дар Ҷумҳурии Ӯзбекистон қарор доштанд. Меҳмононро дар фурудгоҳи «Тошкент» Фармондеҳи Гвардияи миллии Ҷумҳурии Ӯзбекистон генерал-майор Р.Ҷӯраев пешвоз гирифт. Сипас, мувофиқи нақшаи ташрифи расмӣ Фармондеҳи Гвардияи миллӣ ва ҳамроҳонашро дар саҳни Гвардияи миллии Ӯзбекистон қаровули фахрӣ бо тантана истиқбол намуд. Вохурии ҳар ду ҷониб дар толори маҷлисҳо идома ёфт. Дар аввал генерал-лейтенанти гвардия Б. Ҷамолзода аз муносибатҳои дӯстонаи ду кишвари ҳамсоя ва ҳамфарҳанг ибрози андеша карда, оғози ҳамкорӣ ва ояндаи онро нек арзёбӣ кард. Дар идомаи суҳбат генерал-майор Р.Ҷӯраев Фармондеҳи Гвардияи миллӣ ва ҳайати гурӯҳро ба Ҷумҳурии Ӯзбекистон хайрамақдам гуфта, ҳамкории ду сохтори бонуфузро фоли нек таъкид кард.
Дар анҷоми вохурӣ роҳбарони мақомот Нақшаи ҳамкориҳои дуҷонибаро дар соли 2022 ба имзо расонданд, ки татбиқи чорабиниҳоро дар самти тайёр намудани кадрҳо, мубодилаву такмили ихтисос дар фаъолияти хизматӣ пешбинӣ намудааст.
Дар идомаи ташрифи расмӣ ҳайати меҳмонон аз Донишгоҳи амнияти Ҷамъиятии Ҷумҳурии Ӯзбекистон, Маркази таълимии махсусгардонидашуда, Боғи Ғалаба ва чанде аз Ҷузъу томҳои Гвардияи миллии Ҷумҳурии Ӯзбекистон дидан намуданд.
Ташриф дар фазои дӯстӣ, ҳамдигарфаҳмӣ ва сатҳи баланди меҳмоннавозӣ сурат гирифт.

Шуъбаи иттилоот ва робита бо ҷомеаи ГМҶТ