Раҳоӣ аз хурофот ва исроф

Бо ташаббуси Раёсат оид ба корҳои сиёсӣ-тарбиявӣ дар толори қисми ҳарбии 051052-и Гвардияи миллӣ вохӯрии ҳайати афсарони Раёсату шуъбаҳои фармондеҳӣ ва қисмҳои ҳарбии гарнизони Душанбе бо намояндагони Кумитаи кор бо занон ва оилаи назди Ҳукумати Ҷумҳурии Тоҷикистон ва Кумитаи дин ва танзими ҷашну маросими назди Ҳукумати Ҷумҳурии Тоҷикистон баргузор гардид. Вохӯриро муовини фармондеҳи Гвардияи миллии Ҷумҳурии Тоҷикистон огоз намуд. Сипас, намояндаи Кумитаи кор бо занон ва оилаи назди Ҳукумати Ҷумҳурии Тоҷикистон Шаҳло Ҳасанзода суҳбатро идома дода, қайд намуд, ки дар замони соҳибистиқлолии кишвар зиёда аз 60 санади меъёрии ҳуқуқӣ вобаста ба занон ва нақши онҳо дар ҷомеа ба тасвиб расидааст. Аз рӯзҳои аввали соҳибистиқлолии Тоҷикистон Пешвои миллат муҳтарам Эмомалӣ Раҳмон ба ҳаёту фаъолияти занон диққати ҷиддӣ зоҳир менамояд. Ҳамчунин, таъкид шуд, ки нақши занону-модар дар таълиму тарбияи насли наврасу ҷавон муҳим буда, асоси пешрафти ҷомеа ва нигоҳ доштани арзишҳои милливу оилавӣ аз саҳми барҷастаи модарон вобастагии амиқ дорад. Бо ифтихор иброз гардид, ки саҳми занону модарон дар баробари рисолати модарӣ дар ҳама соҳаҳои ҳаёти ҷомеа, аз ҷумла дар хизмати ҳарбӣ, дар сафи муҳофизону родмардони шуҷои Ватан беназир аст. Дар идомаи баромад ба масъалаи симову либоси миллии бонувон, хушунату зуроварӣ дар оила, худдорӣ аз тамоюлҳои хурофот, исроф ва фарҳанги бегона диққати ҷиддӣ зоҳир намуданд.

Намояндагони Кумитаи дин ва танзими ҷашну маросими назди Ҳукумати Ҷумҳурии Тоҷикистон дар маърӯзаҳои худ санадҳои меъёрӣ-ҳуқуқиро дар соҳаи дин ва ҷашну маросимҳо ҳамаҷониба таҳлилу баррасӣ намуда, аз қабул ва дар амал татбиқ намудани қонуни миллӣ, дар бораи танзим ва ҷашну маросимҳо,таѓйиру иловаҳо ба он андешаронӣ карданд. Зикр шуд, ки қабул шудани қонуни мазкур дар ҳаёти иқтисодиву иҷтимоии мардум таъсири мусбӣ гузошта, он ҳамчун санади меъёрии ҳуқуқӣ муносибатҳои ҳаётан муҳими ҷамъиятро ба танзим медарорад. Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва ҳукумати мамлакат дар самти беҳтар гардонидани шароити иқтисодию иҷтимоии мардум ва таъмин намудани зиндагии шоистаи мардум пайваста тадбирандешӣ менамояд. Қонуни мазкур дар амали гардонидани ҳадафҳои олии ҳукумати кишвар ва бо тарзу тартиби муайян баргузор намудани ҳама гуна ҷашну маросим нақши муҳим мебозад.
Дар охир аз иштирокдорони толор даъват ба амал оварда шуд, ки пеш аз ҳама дар роҳи таълиму тарбияи фарзандон, ҷилавгирӣ аз ҳаргуна хурофот ва роҳ надодан ба исрофкорӣ аз ҳарвақта дида, бештар кӯшишу талош намоянд.