“Оина” меҳмони сарбозон

Санаи 9 феврали соли ҷорӣ дар асоси нақша-чорабиниҳои раёсати корҳои сиёсӣ-тарбиявӣ дар қисми ҳарбии 051055-и Гвардияи миллии Ҷумҳурии Тоҷикистон бахшида ба 29 - солагии таъсисёбии Қувваҳои Мусаллаҳи Ҷумҳурии Тоҷикистон, инчунин бо мақсади баланд бардоштани ҳолати рӯҳию равонии хизматчиёни ҳарбӣ чорабинии фарҳангӣ баргузор гардид.
Дар чорабинии мазкур Оркестри ҳарбии Гвардияи миллии Ҷумҳурии Тоҷикистон, санъаткорони театри “Оина” бо саҳнаҳои ҷолиб ва барномаи фарҳангӣ ҳунарнамоӣ карда, хотири ҳозиринро болида намуданд. Ҳунармандон сараввал ҳайати шахсии Гвардияи миллиро ба 29 - солагии таъсисёбии Артиши миллӣ табрик намуда, барояшон дар хизмати софдилона ба манфиати халқу Ватан барору комёбиҳо таманно намуданд.
Мавзуи саҳначаҳо аз ҳаёти ҳамарӯзаи мардум гирифта шуда, ҳунармандон камбудиву норасоиҳои ҷомеа ва лаҳзаҳои гуворои зиндагиро манзури тамошобинон намуданд. Дар қатори саҳнаҳои ҳаҷвӣ ширинкорону ҳунармандони театри “Оина” ва ҳайати ҳунарии Оркестри ҳарбии Гвардияи миллӣ бо сурудҳои ватандӯстонаву дилнишини худ ба чорабинӣ ҳусни дигар бахшиданд.
Дар охир масъулини корҳои сиёсӣ-тарбиявӣ ба ҳунармандон барои иштирок ва ҳунарнамоӣ изҳори сипос намуда, таъкид карданд, ки чунин чорабиниҳо дар дигар қисмҳои ҳарбии Гвардияи миллӣ идома меёбанд.



Лейтенанти хурди гвардия
Илоҳиҷон Насриддинзода