Мусобиқаҳои варзишӣ оғоз шуд

Ба муносибати сазовор таҷлил намудани ҷашни Истиқлоли давлатӣ ва Рӯзи таъсисёбии Гвардияи миллии Ҷумҳурии Тоҷикистон аз 19 - уми августи соли равон байни дастаҳои варзишии қисмҳои ҳарбии Гвардияи миллӣ мусобиқаҳои ҳарбӣ- варзишӣ оғоз гардид. Маросими ифтитоҳи мусобиқаҳои варзишӣ бо иштироки муовини Фармондеҳи Гвардияи миллӣ оид ба тайёрии ҷангӣ ва махсус полковники гвардия Талбидагӣ Давлатзода, муовини Фармондеҳи гвардияи миллӣ оид ба корҳои сиёсӣ - тарбиявӣ полковники гвардия Маҳмаднаим Собириён ва иштирокчиёни чорабинии варзишӣ дар заминаи қисми ҳарбии 051055 баргузор шуд.
Муовинони Фармондеҳи Гвардияи миллӣ ҳайати варзишгарони ҷузъу томҳоро ба ҷашнҳои миллӣ табрик гуфта, барои фаъолона иштирок намудан дар мусобиқаҳо барору комёбӣ таманно кард. Зикр шуд, ки аз тарафи Раёсати тайёрии ҷангии фармондеҳӣ мусобиқаҳои варзишӣ байни варзишгарони қисмҳои ҳарбӣ пайваста доир карда мешаванд ва афсарону сарбозон маҳорату малакаи варзишии хешро нишон медиҳанд. Ҳарчанд принсипи асосии мусобиқа қувваозмои варзишгарон бошад, ҳам вале ҳадафи асосӣ - дӯстӣ иттиҳоду рафоқат мебошад.
Воқеан, варзишгарони номовари тоҷик ҳамеша дар сабқатҳои паҳлавонӣ ва ҳатто дар мусобиқаҳои сатҳи минтақа ва ҷаҳон пеш аз ҳама хоксорӣ ва хислати некӯӣ ва мардонагиро асосан пешаи худ мекунанд. Ин хусусияти волои варзишӣ дар хизмати ҳарбӣ ҳам риоя мешавад.
Дар асоси нақшаи тасдиқгардида, мусобиқаҳои варзишӣ миёни хизматчиёни ҳарбӣ аз намуди футбол, волейбол, турниккашиву дастхобонӣ, давидан ба масофаи 100м, шоҳмот, нопурра ба қисмҳо ҷудо ва ҷамъ намудани силоҳи оташфишони АК-74, гулӯлабардорӣ, такя бо дастон ва тениси рӯи миз то санаи 24-уми август идома меёбанд. Дастаҳои варзишгарони ғолиб дар чорабинии тантанавӣ аз тарафи Фармондеҳи Гвардияи миллӣ бо ҷому медал ва дигар тӯҳфаҳои хотиравӣ сарфароз гардонида мешаванд.
Родмардон