Нақшаи даъват 22 фоиз иҷро шуд

Имрӯз, 6 апрели соли 2022 зиёда аз 60 нафар наваскарон барои анҷом додани хизмати ҳарбӣ ба Маркази тайёрии кадрҳои Гвардияи миллии Ҷумҳурии Тоҷикистон ворид шуданд. Ҷавононро дар саҳни ҳавли командири қисми ҳарбӣ ва дигар шахсони масъул қабул карда, барои ғайрату самимият ва омодагӣ ба хизмати Модар- Ватан аҳсант гуфтанд. Командири Маркази тайёрии кадрҳо подполковники гвардия Раҳимзода Олим дар идомаи суҳбат ба наваскарон аз тартиби хизмати ҳарбӣ, қоидаҳои умумӣ ва таҷрибаи садҳо нафар ҷавонони ватандӯст сухан гуфта, онҳоро ба риояи талаботи Оинномаҳои ҳарбӣ ва эҳтироми ҳамдигар ҳамчун дӯсту бародар дастур дод. Қабули наваскарон дар асоси ҳуҷҷатҳои шахсӣ ва мувофиқи тартиботи дохилӣ дар Марказ идома ёфт.
Чуноне ки сардори шуъбаи ташкили сафарбарии Сарситоди Гвардияи миллӣ полковники гвардия Исоев Қурбоналӣ маълумот дод, дар 6 рӯзи даъвати ҷавонон ба хизмати ҳарбӣ нақшаи даъвати наваскарон дар Гвардияи миллӣ 22 фоизро ташкил медиҳад. Аз ин ҳайат ҳама ихтиёрӣ буда, 7 фоизи онро ҷавононе ташкил медиҳанд, ки баъди хатми муассисаҳои олӣ хизмати ҳарбиро интихоб кардаанд. Ҳамчунин сафи ҷавонони оиладор ҳам кам нест. Мувофиқи барномаи таълимӣ Маркази тайёрии кадрҳо бояд дар муҳлати муайяншуда таълиму тарбияи ибтидоии хизмати ҳарбиро ташкилу ба роҳ монда, наваскаронро барои қабули Савганди ҳарбӣ омода намояд.


Родмардон

06.04.2022