Конститутсия сарчашмаи ҳуқуқу озодиҳо

Ҳамасола 6 ноябр дар кишвар Рӯзи Конститутсияи Ҷумҳурии Тоҷикистон таҷлил гардида, дар доираи он чорабиниҳои гуногуни илмӣ, фарҳангӣ, симпозиуму конфронсҳои ҷумҳуриявӣ ва мизҳои мудаввар ташкилу баргузор карда мешаванд. Ҳамзамон дар корхонаву ташкилотҳо, вазорату идораҳо ва дигар сохторҳои давлатӣ ин рӯзро бошукӯҳу шаҳомати хосса ҷашн мегиранд. Дар баробари дигар сохторҳои давлатӣ дар Гвардияии миллии Ҷумҳурии Тоҷикистон низ Рӯзи Конститутсия баргузор гардид.
Дар кори он Ёрдамчии судяи суди конститутсионии Ҷумҳурии Тоҷикистон Тоҷиддин Сатторов, прокрори ҳарбии шуъбаи назорати умумии Сарпрокуратураи ҳарбии Ҷумҳурии Тоҷикистон полковники адлия Салимзода Каримҷон, муовини фармондеҳи Гвардияи миллии Ҷумҳурии Тоҷикистон оид ба корҳои сиёсӣ-тарбиявӣ полковники гвардия Собириён Маҳмаднаим, сардорони раёсату шуъбаҳо ва афсарони Гвардияи миллӣ иштирок намуданд. Дар оғоз роҳбарияти Гвардияи миллӣ меҳмононро хайрамақдам гуфта, баргузории ин чорабиниро дар болобурдани маърифати ҳуқуқии хизматчиёни ҳарбӣ, таъмини волоияти қонун ва огоҳонидани ҳама қишрҳои ҷомеа арзёбӣ кард. Ҳамзамон ёдовар шуд, ки Конститутсияи Ҷумҳурии Тоҷикистон ҳамчун шиносномаи давлатдорӣ тайи 31 сол мешавад, дар бунёди ҷомеаи адолатпарвар, рушди қонунгузорӣ, пойдории давлатдории миллӣ ва таъмини ҳуқуқу озодии шаҳрвандон аз он ҷумла хизматчиёни ҳарбии Гвардияи миллӣ заминагузор аст.
Меҳмонони чорабинӣ низ доир ба нақши ин санади тақдирсоз изҳори андеша карда, зикр доштанд, ки 6 ноябри соли 1994 дар раъйпурсии умумихалқӣ Конститутсияи Ҷумҳурии Тоҷикистон қабул карда шудааст. Конститутсия заминагузор ба қонуну санадҳои меъёрии ҳуқуқии моҳиятан миллӣ дошта, таъсир гузошта, ҳамзамон ҳама қонунҳои кишвар аз Конститутсияи амалкунанда сарчашма мегиранд.
Бояд гуфт, ки Конститутсияи Ҷумҳурии Тоҷикистон шакли давлатдорӣ, асосҳои сиёсӣ, иқтисодӣ ва иҷтимоии давлатро муайян менамоянд. Дар баробари ин тамомои асосҳои ҳуқуқии Қувваҳои Мусаллаҳ ва вазифаҳои шаҳрвандонро дар ин самт танзим ва муайян мекунад. Амният ва мудофиаи кишварро вазифаи муқаддаси ҳар шаҳрванди Ҷумҳурии Тоҷикистон мешуморад. Ин нукта махсусан дар моддаи 43-и Конститутсияи Ҷумҳурии Тоҷикистон омадааст: “Ҳифзи Ватан, ҳимояи манфиати давлат, таҳкими истиқлолият, амният ва иқтидори мудофиавии он вазифаи муқаддаси шаҳрванд аст. Тартиби хизмати ҳарбиро қонун муайян мекунад.”