Мо насли хушбахти замон

Тарбияи кӯдакону насли ҷавон дар рӯҳияи худшиносиву ватандӯстӣ ва муқаддас донистани ҳифзу ҳимояи Модар-Ватан вазифаи аввалиндараҷаи аҳли ҷомеа мебошад. Дар ҷомеаи муосир, ки хавфи аз байн рафтани хусусиятҳои фарҳанг ва арзишҳои миллӣ рӯз ба рӯз бештар мегардад, ин масъала яъне тарбияи ҷавонону наврасон дар рӯҳияи эҳтирому арҷгузорӣ ба расму оин, анъанаҳо ва дигар унсурҳои миллӣ тақозои замон аст. Вобаста ба ин аз тарафи Ҳукумати мамлакат пайваста тадбирҳои заруриву саривақтӣ амалӣ карда мешавад.
Бо ин мақсад ва дар доираи нақша-чорабиниҳои Гвардияи миллии Ҷумҳурии Тоҷикистон бо муассисаҳои таҳсилоти миёнаи умумии шаҳру ноҳияҳои кишвар хизматчиёни ҳарбии Гвардияи миллӣ дар чорабиниҳои ҷашниву фарҳангии муассисаҳои таълимӣ фаъолона иштирок менамоянд. Ҳафтаи сипаригардида, хизматчиёни ҳарбии Гвардияи миллӣ, аз ҷумла ҳайати шахсии ротаи қаровули фахрии қисми ҳарбии 051054 ва ҳайати Оркестри ҳарбӣ дар як қатор чорабиниҳои ҷашнии муассисаҳои таҳсилоти миёнаи умумии ноҳияи Синои шаҳри Душанбе иштирок намуда, бо нишон додани маҳорати касбӣ хотири хонандагонро шод гардониданд. Чорабиниҳои ҷашнии муассисаҳои таҳсилоти миёнаи умумии 27, 73, 87 ва 95-и Синои шаҳри Душанбе бо омодагии ҷиддӣ ва баргузории барномаҳои фарҳангиву ҳарбӣ доир карда шуданд. Ороиш ва насби шиору овезаҳо дар васфи Ватан-Модар, Тоҷикистони соҳибистиқлол, хизмат дар сафи Қувваҳои Мусаллаҳ, пӯшидани либоси низомӣ ва таҳияи барномаи фарҳангӣ аз ҷониби толибилмон ба чорабиниҳо зебоӣ замъ намуд.
Сарбозони ротаи қаровули фахрӣ машқҳои махсуси низомиро бо силоҳи карабин намоиш дода,таваҷҷуҳи хонандагонро бештар ҷалб намуданд. Мактаббачаҳо ба сару либос ва амали сарбозон бо ҳавас менигаристанд.
Мактаббачагон ҳам дар навбати худ кӯшиш намуданд, ки ҳунару истеъдодашонро ба намоиш гузоранд. Онҳо саҳнаҳои ҷолибу диданӣ, амалҳои сафороӣ, қироати суруду таронаҳои ватандӯстиро пешкаши иштирокдорон намуданд. Барномаҳои фарҳангии муассисаҳои таълимӣ рангоранг буда, зери роҳбарии масъулини муассисаҳо ва устодону муррабиён гузаронида шуданд.
Хизматчиёни ҳарбии Гвардияи миллӣ ба дигар муассисаҳои таълимии шаҳру ноҳияҳо низ ташриф оварда, хонандагон-насли наврасу ҷавонро ба илму маърифат, ҷасорату шуҷоат ва дӯстдоштани Модар-Ватан ҳидоят намуданд. Иштироки хизматчиёни ҳарбӣ дар чорабиниҳои фарҳангиву маърифатии хонандагон пеш аз ҳама дар раванди тарбияи худшиносиву худогоҳӣ, масъулияти ватандориву меҳанпарастӣ саҳми босазо мегузоранд.

Майори гвардия Неъматуллои Холиқ