Ҷамъомадҳои таълимии воҳидҳои артиллерӣ

Дар асоси Нақшаи ягонаи чорабиниҳои асосии Гвардияи миллии Ҷумҳурии Тоҷикистон дар соли хониши 2022, инчунин бо мақсади баланд бардоштани сатҳи дониш, сайқал додани маҳорату малакаи касбӣ ва гузаронидани машғулиятҳои оташфишонӣ аз аслиҳа ва техникаҳои артиллерӣ аз 6 апрел то 30 апрели соли 2022 бо ҳайати шахсии ҷузъу томҳои артиллерии Гвардияи миллӣ машғулиятҳои саҳроӣ бо тирпарронии ҷангӣ ташкил ва гузаронида шуд.
Машқҳои амалии оташфишонӣ бо ҳайати шахсии қисмҳои ҳарбии 051055, 051058, 051059, 051064 дар Маркази миллии таълимӣ оид ба мубориза бо терроризм ва маводи мухаддир бо муваффақият ва самаранок анҷом ёфт. Роҳбарии ҷамъомадҳои таълимии ҷузъу томҳои артиллериро афсарони ботаҷрибаи ин воҳид ба зимма доштанд. Барои пурсамар гузаронидани машқҳои саҳроӣ мавзӯъҳо дар ҳайати дастаҳо ташкилу ба роҳ монда шуда, амали онҳо мувофиқи вазифаҳои ҷангӣ зина ба зина иҷро гардид. Баъди ба даст овардани маҳорату малака дар иҷрои вазифаҳои ҷангӣ сержантону сарбозон ба оташфишонӣ оғоз намуданд.
Ба чунин машқҳои амалии саҳроӣ ҳайати шахсии қисми ҳарбии 051056 низ ҷалб гардиданд. Машғулиятҳо дар машқгоҳи саҳроии «Чорруқ-даррон» доир карда шуд. Роҳбарони машғулият дар нуқтаҳои таълимӣ ҳайати шахсиро доир ба риояи чораҳои бехатарӣ ҳангоми иҷрои машқи тирпарронӣ, таъинот ва хислатҳои ҷангии силоҳу муҳимоти ҷангӣ бори дигар шинос намуданд. Машғулиятҳои дастурдиҳӣ пеш аз оғози тирпаронӣ бо воҳидҳои артиллерӣ, зенитиву миномётӣ, гурӯҳҳои пулемётчиёну норинҷакандозон ва экипажи мошинҳои зиреҳпӯши ҷангӣ, ки онҳо низ ба машқҳои амалии саҳроӣ машғул буданд, гузаронида шуд. Рафти машғулиятҳои саҳроиро фармондеҳи Гвардияи миллии Ҷумҳурии Тоҷикистон генерал-лейтенанти гвардия Бобоҷон Ҷамолзода назорат карда, донишу маҳорат ва малакаи касбии афсарону сарбозонро баҳогузорӣ кард. Барои самарабахш анҷом додани машғулиятҳои амалии тирпаронӣ, машғулиятҳои назариявӣ заминаи асосӣ буда, омӯзиши онҳо дар сатҳи зарур ба роҳ монда мешавад. Натиҷаи ин машғулиятҳо буд, ки машқҳои амалии оташфишонӣ аз ҷониби хизматчиёни ҳарбӣ пай дар пай ва моҳирона иҷро карда шуд.
Аз раванди машғулиятҳои амалии оташфишонӣ маълум гардид, ки ҳайати шахсии ба ҷамъомадҳо ҷалб гардида, барномаи таълимиро дуруст аз бар намуда, маҳорату малакаи ҷангии хешро такмил додаанд.


Капитани гвардия Неъматуллои Холиқ