Рисолати ҷавонмардӣ

Маросими қабули Савганди ҳарбӣ ва хайрбод бо Парчами Ҷангии қисми ҳарбӣ яке аз чорабиниҳои асосӣ дар хизмати ҳарбӣ буда, нишони садоқат ба Ватан, ба миллату сарзамин ва ифтихору сарбаландӣ аз нерӯи ҷавонмардона, ҷасорат, доштани нангу номуси миллӣ мебошад. Ин гурӯҳи ҷавонони қавиирода сарбозону сержантони Гвардияи миллӣ мебошанд, ки муҳлати муқарраргардидаи хизмати ҳарбиро тибқи қонун анҷом дода, ба эҳтиёти ҚМҶТ рухсат мешаванд. Акнун бо сари баланду ифтихори ватандорӣ, бо захираи донишҳои ҳарбӣ-сиёсӣ, маҳорату малакаи ҷангӣ, ки дар ин давраи ҳаёт дар мактаби ҷасорату мардонагӣ аз худ кардаанд, барои амалӣ намудани нақшаҳои оянда дар шоҳроҳи зиндагӣ устуворона қадам мегузоранд.
Ба ифтихори ин сержантону сарбозон дар қисми ҳарбии 051055 Гвардияи миллӣ чорабинии тантанавӣ баргузор гардид. Ҷавонони ғайюру далери ватанро, ки аз қисмҳои ҳарбии гарнизони Душанбе ҷамъ омада буданд, ҳайати фармондеҳии Гвардияи миллӣ ба ин рӯзи фаромушнашавандаи хизмати ҳарбӣ табрик гуфта, таъкид карданд, ки ҳамеша ба Савганди худ содиқ ва минбаъд ҳам дар ҳама ҷо барои нигоҳ доштани обуруву эҳтироми миллат, манфиатҳои давлат ва пешрафти Тоҷикистони маҳбуб саҳмгузор бошанд.
Дар баробари билети ҳарбӣ як гурӯҳ сержантону сарбозон барои хизмати намунавӣ, нишондодҳои баланд дар тайёрии ҷангӣ, иштироки фаъолона дар чорабиниҳои муҳими сиёсӣ, ҳарбӣ, фарҳангиву варзишӣ аз ҷониби командирони қисмҳои ҳарбӣ бо рутбаҳои навбатӣ, ифтихорнома, мактубҳои минатдорӣ ба волидон сарфароз гардонида шуданд.
Дар ҷамъомад чанде аз беҳтарин сержантҳо аз қисмҳои ҳарбии гарнизони шаҳри Душанбе дар ҳузури ҳайати Фармондеҳӣ ва сарбозони навдаъватшуда сухан карда, аз лаҳзаҳои беҳтарин ва аҳамияти хизмати ҳарбӣ таассуроти худро баён карданд.
Маросими хайрбод қисмати фараҳбахшу хотирмони ҷамъомад гардид. Сержантону сарбозон бо яке аз муқаддастарин нишонҳои хизмати ҳарбӣ-Парчами ҷангӣ, ки ҳамеша ҳамсафу фахри онҳо буд, хайрбод гуфтанд. Ҷамъомади тантанавиро расми гузашти низомӣ анҷом бахшид, ки хизматчиёни ҳарбии ба эҳтиётрухсатшуда аз назди ҳайати Фармондеҳӣ бо ифтихору сарбаландӣ қадам заданд.