Маросими ба эҳтиёт рухсат намудани хизматчиёни ҳарбӣ

Даъвати ҷавонон ба сафҳои Артиши миллии Тоҷикистон мутташакилона идома дорад. Дар Маркази тайёрии кадрҳои Гвардияи миллии Ҷумҳурии Тоҷикистон қабули наваскарон, аз худ намудани барномаи таълимӣ ва омода кардани сарбозон ба маросими савганди ҳарбӣ дар сатҳи зарурӣ ташкилу ба роҳ монда шудааст. Масъулини Марказ барои таълиму тайёр намудани наваскарон шароити мусоид фароҳам оварда, аз ҳисоби афсарону сержантон собиқадорони хизмати ҳарбӣ мураббиёнро ба ин чорабинӣ ҷалб намудаанд.
Ҳисси баланди худшиносӣ ва руҳияи ватандӯстии ҷавонон боис гардида, ки сафҳои Гвардияи миллии Тоҷикистон дар навбати аввал аз ҳисоби ҷавонони соҳибмаълумоту соҳибкасб пурра мегардад. Аз ҷониби дигар дастгириву ѓамхориҳои пайвастаи Пешвои миллат- Президенти Ҷумҳурии Тоҷикистон муҳтарам Эмомалӣ Раҳмон ва тадбирҳои судманди Ҳукумати Ҷумҳурии Тоҷикистон дар самти баланд бардоштани мақоми ҷавонон ва масъулияти падару модар дар таълиму тарбияи фарзанд боиси руҳияи баланди ватандӯстии ин қишри фаъоли ҷомеа гардидааст. То 14 октябри соли 2025 нақшаи даъват дар Гвардияи миллии Ҷумҳурии Тоҷикистон 80 фоиз иҷро шудааст.
Дар баробари қабули навдаъватшудагон хизматчиёни ҳарбие, ки муҳлати хизматро анҷом додаанд ба эҳтиёти Қувваҳои Мусаллаҳи Ҷумҳурии Тоҷикистон рухсат карда мешаванд. Бо ин мақсад дар қисми ҳарбии 051055 Гвардияи миллӣ ба ифтихори 100 нафар чунин сарбозону сержантон чорабинии тантанавӣ баргузор гардид. Онҳоро ба ин санаи муҳими таърихи ҳаёташон ҳайати фармондеҳии Гвардияи миллӣ табрик гуфта, таъкид кард, ки минбаъд ҳам дарҳои Гвардияи миллӣ барои Шумо кушода аст.
Барои хизмати намунавӣ, нишондодҳои баланд дар тайёрии ҷангӣ, иштироки фаъолона дар чорабиниҳои муҳими сиёсӣ, ҳарбӣ, фарҳангиву варзишӣ як гурӯҳ сержантону сарбозон аз ҷониби командирони қисмҳои ҳарбӣ бо рутбаҳои навбатӣ, ифтихорнома, мактубҳои минатдорӣ ба волидон сарфароз гардонида шуданд.
Сержантону сарбозон бо яке аз муқаддастарин нишонҳои хизмати ҳарбӣ-Байрақи ҷангӣ, ки ҳамеша ҳамсафу фахри онҳо буд, хайрбод гуфтанд. Ҷамъомади тантанавиро расми гузашти низомӣ анҷом бахшид, ки хизматчиёни ҳарбии ба эҳтиётрухсатшуда аз назди ҳайати Фармондеҳӣ бо ифтихору сарбаландӣ қадам заданд.