Машғулиятҳои таълимӣ - тактикии ротавӣ

Аз моҳи апрели соли равон тибқи нақшаи тайёрии ҷангии Гвардияи милии Ҷумҳурии Тоҷикистон машғулиятҳои амалии саҳроӣ бо ҳайати фармондеҳӣ ва ҷузъу томҳои қисмҳои ҳарбии Гвардияи миллии Ҷумҳурии Тоҷикистон оғоз гардида, марҳила ба марҳила ҷараён доранд.
Аз ҷумла, машғулиятҳои амалии саҳроӣ бо воҳидҳои артиллерӣ, таъиноти махсус ва ҷузъу томҳои алоҳидаи қисми ҳарбии 051056 дар машқгоҳи саҳроии “Чоруқдаррон”-и Вазорати мудофиаи Ҷумҳурии Тоҷикистон гузаронида шуд. Машғулиятҳои таълимӣ - тактикии ротавӣ ба таври намунавӣ доир гардид. Аз рўи маълумоти бадастовардаи разведка: гўё дар минтақаи муайян гурўҳи мусаллаҳи ғайриқонунӣ, ки қувва ва воситаҳои ҷангии он муайян шудааст, қасди ба минтақа ҳуҷум кардан доранд. Роҳбари таълимот вазъиятро таҳлил намуда, вобаста ба иҷрои вазифаҳои хизматӣ ва зада гардонидани ҳуҷуми душмани шартӣ дар назди ҳайати шахсӣ вазифаҳои мушаххаси ҷангӣ гузоштанд. Баъди қабули вазифаҳои ҷангӣ, ҳайати шахсӣ ба иҷрои вазифаҳо шурўъ намуданд. Амали тарҳрезишуда дар ду марҳила, яъне мудофиа ва ҳуҷум иҷро карда шуд. Нахуст ротаи аввал дар мудофиа қарор гирифта, бо истифода аз силоҳи оташфишони ҷангӣ ва техникаҳои дар ихтиёрдошта амал карданд. Барои ба ҳуҷум гузаштан шароит фароҳам оварданд. Дар марҳилаи дуюм ротаи дигар ба ҳуҷум гузашта, бо истифодаи қувваву воситаҳо душмани шартиро мавриди ҳадаф қарор дода, нобуд намуданд.
Рафти баргузории машқҳои амалӣ аз тарафи муовини фармондеҳи Гвардияи миллӣ оид ба аслиҳа ва техникаи ҳарбӣ генерал-майори гвардия Самарзода Қиёмиддин, мушовири фармондеҳ генерал-майори эҳтиётӣ Дониёров Илҳом, роҳбарият ва сардорони шуъбаву хадамотҳои қисми ҳарбӣ назорат шуда, иҷрои амалҳои тактикиву оташфишонӣ мавриди таҳлил ва баҳогузорӣ қарор гирифт. Вобаста ба риояи чораҳои бехатарӣ, иҷрои саривақтии амалҳо ва дар маҷмўъ барои идоракунии роҳбарони машғулият ва моҳирона аз иҷрои вазифаҳои ҷангӣ баромадани ҳайати шахсӣ баҳои хуб дода шуд. Ҳамчунин бо мақсади беҳтар ва бештар мустақилона кор кардану баланд бардоштани дониш ва маҳорати ҷангии ҳайати роҳбарикунанда ёрии амалӣ расонида шуд.
Баъди анҷоми машғулиятҳо роҳбарияти қисми ҳарбӣ як қатор афсарону сержантон ва сарбозонро барои интизоми намунавӣ ва дар сатҳи баланд иҷро кардани вазифаҳои ҷангӣ бо ифтихорнома, соатҳои дастӣ сарфароз гардониданд.
Неъматуллои Холиқ
майори гвардия