Тантанаҳои ҷашни Артиш
Ошхонаи сайёри низомӣ ва таъоми сарбозӣ

Чанд соли ахир аст, ки бо ибтикори ниҳодҳои ҳарбии Ҷумҳурии Тоҷикистон дар арафаи Рӯзи Артиши миллӣ дар боғҳои шаҳри Душанбе барномаҳои тарбиявии ҳарбӣ-ватандӯстӣ, чорабиниҳои сиёсиву низомӣ, фарҳангиву фароғатӣ, базмҳои рангини консертӣ, мусобиқаҳои варзишӣ ташкилу ба роҳ мода шуда, ҳамзамон ошхонаи сайёри низомӣ бо як навъ таъоми омоданамудаи сарбозӣ низ пешниҳоди меҳмонону иштирокчиёни чорабинӣ мегардад.
Имсол низ ин иқдом аз ҷониби ниҳодҳои ҳарбии мамлакат ба роҳ монда шуда, дар тамоми боғҳои пойтахти кишвар чорабиниҳои гуногун ташкилу гузаронида шуд. Аз ҷумла санаи 22 феврали соли равон дар Боғи фарҳангу фароғатии ба номи Абулқосим Фирдавсии шаҳри Душанбе чорабинии тантанавӣ бахшида ба 31-умин солгарди таъсисёбии Қувваҳои Мусаллаҳи Ҷумҳурии Тоҷикистон баргузор гардид. Дар он намояндагони Гвардияи миллии Ҷумҳурии Тоҷикистон, Вазорати мудофиаи Ҷумҳурии Тоҷикистон, Мақомоти иҷроияи ҳокимияти давлатии ноҳияи Синои шаҳри Душанбе, хонандагону донишҷӯёни муассисаҳои таҳсилоти миёна ва олии кишвар инчунин сокинони шаҳри Душанбе иштирок намуданд.
Дар оғоз муовини вазири мудофиаи Ҷумҳурии Тоҷикистон генерал-майор Ғуломзода Абдулҳошим Даврон ба сухан баромада тамоми хизматчиёни ҳарбиро бо Рӯзи Артиш табрику таҳният намуд. Пас аз ин аз ҷониби афсарони таъиноти махсуси Гвардияи миллии Ҷумҳурии Тоҷикистон намоиши муҳорибаҳои тан ба тан пешкаши ҳамагон гардонида шуд, ки ҳисси ватандўстии ҷавононро боло мебардошт. Сипас аз ҷониби ҳайати сарбозону сержантони баталёни Қаравули фахрии Гвардияи миллӣ намоиши ҳаракатҳои сафороӣ ва намоиш бо истифода аз карабин манзури ҳозир гардонида шуд. Баҳри болидахотирии иштирокдорон барномаи консертӣ пешниҳод кардашуд, ки саршор аз суруду таронаҳои ватандўстӣ буд.
Дар як гушаи боғ ошхонаи сайёри низомӣ бо як навъ таъоми сарбозӣ аз тарафи масъулини Раёсати ақибгоҳи Гвардияи миллӣ дар сатҳи баланд омода карда шуд, ки ба хонандагону донишҷӯён ва умуман ҷавонону сокинони иштирокчии ин чорабинӣ пешкаш карда шуд.
Ҳадаф аз баргузории ин гуна чорабиниҳои сиёсиву низомӣ, фарҳангиву фароғатӣ, базмҳои рангини консертӣ, мусобиқаҳои варзишӣ ин боло бардоштани ҳисси миллии ватандӯстӣ, огаҳ намудани ҷавонону наврасон аз шароити хизмати ҳарбӣ ва бо ин васила баланд бардоштани ҳуввияти миллии ҷавонон мебошад.

Шуъбаи иттилоот ва робита бо ҷомеаи Гвардияи миллӣ