Аз хизмат ба хизмат

Мавсими даъвати ҷавонон ба сафи Қувваҳои Мусаллаҳи Ҷумҳурии Тоҷикистон бо маром идома дорад. Дар баробари ин хизматчиёни ҳарбие, ки муҳлати муқарраргардидаи хизмати ҳатмии ҳарбиро дар ҷузъу томҳо сарбаландона ба охир расониданд, давра ба давра ба эҳтиёти Қувваҳои Мусаллаҳ рухсат мешаванд. Маврид ба зикр аст, ки сарбозон дар хизмати ҳарбӣ дарси садоқатмандиву шуҷоат ва мардонагӣ омўхта, ҳимояи Ватан-Модарро қарзи муқаддаси шаҳрвандӣ медонанд. Ҳамин аст, ки қисме аз сарбозону сержантон хизмати ҳарбиро, ки рисолати бузурги ҷавонмардӣ ва роҳи мардони асил мебошад, ба худ касб интихоб мекунанд.
Дар Маркази тайёрии кадрҳои Гвардияи миллӣ барномаи мукаммали курси афсарони ҷавон ва прапоршикон аз моҳи январ то моҳи апрели соли равон идома ёфт. Ба курсҳои мазкур таълимгирандагон аз ҳисоби сарбозону сержантони хоҳишманд, ки хизмати ҳарбиро бо интизоми намунавӣ, иҷрои бечуну чарои уҳдадориҳои хизматӣ пеш мебурданд, ҷалб карда шуданд. Албатта, барои сарбаландона ба итмом расонидани барномаҳои таълимӣ ва супоридани санҷишҳои фаннӣ аз таълимгирандагон кўшишу талоши зиёд лозим меояд. Зиёда аз чил нафар сарбозону сержантон курсҳои мазкурро бо баҳои арзанда ба охир расонида, аз санҷиш ҳам гузаштанд. Моҳи апрел хатмкардагони курсҳои мазкур ба рухсатӣ рафта, як моҳ назди падару модар қарор доштанд. Дар ин миён, мутаасифона, се нафар шарафёб нагардиданд ва барои онҳо муҳлати таълим тамдид карда шуд.
Ҳамин тариқ, баъд аз рухсатӣ санаи 30-юми апрели соли равон Фармондеҳи Гвардияи миллии Ҷумҳурии Тоҷикиситон генерал-лейтенанти гвардия Бобоҷон Ҷамолзода бо хатмкардагони курси афсарони ҷавон ва прапоршикон ҳамсуҳбат шуда, ба онҳо барои сарбаландона хатм кардани курсҳои таълимӣ изҳори қаноатмандӣ намуд. Ба хатмкардагони марказ таъкид кард, ки минбаъд ҳам дар иҷрои вазифаҳои хизматӣ бо масъулияти дучанд рафтор намуда, барои пешрафти хизмат ва ноил гардидан ба дастовардҳои шоён ҷаҳду талош намоянд.
Фармондеҳи Гвардияи миллии Ҷумҳурии Тоҷикиситон хатмкардагони Маркази тайёрии кадрҳои Гвардияи миллиро бо рутбаҳои навбатии ҳарбии “прапоршики гвардия” ва “лейтенанти хурди гвардия” сарфароз гардонида, ба вазифаҳои муносиб таъин намуданд. Онҳо аз якуми май ба иҷрои вазифаҳои хизматӣ шурўъ мекунанд.
Неъматуллои Холиқ
майори гвардия